Гьелъул гIуцIарухъабилъун рукIана Пушкинил цIаралда бугеб библиотекаялъул коллектив ва Дагъистаналъул Журналистазул союз. ЧIварал журналистал ракIалдещвезаризе, гьезул бицине рачIаразда гьоркьор рукIана республикаялда лъугьа-бахъунелъул ургъел бугел студентал, журналистал, хIакимзаби ва гIадатиял гIадамал.

Тадбир рагьиялъулаб кIалъаялда Дагъистаналъул Журналистазул союзалъул председатель ГIали Камаловас гьадин абуна: "ТакъсирчагIаз гIужие восарав журналистасул щивав вукIана рагIи бегIерав, махщел камилав къалмил устар. Заман хисула, хъулухъалде цояв вачIуна, цогидав уна, амма инсанасда лъикIаб ялъуни квешаб рахъалдасан лъураб цIар цIунун хутIула. ГьанжелъизегIан республикаялда чIван вуго къого журналист. Гьеб къадар гIемер буго, гьезул щивав вукIана республикаялъул букIинеселъул пикру гьабулев, ватIаналъе гIоло рухI кьезе хIадурав инсанлъун. Гьедин ккезеги ккана. Гьел гIумруялдаса гIадада ратIалъичIеллъи якъинго лъала нилъеда. Гьезул цIарал цIунун хутIизе руго абадиялъго. ЧIварал журналистал рукIана батIи-батIияб гIелалъул, гIумру-ялъул, амма щивасул букIана цого пикру, цого идеология ва цого къагIидаялда тIекълъиялдагун такъсирчилъиялда данде къеркьезе, ритIухълъи цIунизе рекIел хIасрат".

ЦогIаги такъсир тIубанго рагьун гьечIолъиялъулги бицана гьес. "ГIицIго "ХIакъикъат" газеталъул жавабияв секретарь ГIабдулмалик АхIмадилов чIварал чагIи гурого кодор щвечIо низам цIунулезухъе. Гьебгиха, такъсир гьабурал хъачагъал жанир тIамун руго, амма журналист чIвайилан буюрухъ кьурав чи жеги эркенлъиялда вуго", — ян абуна Дагъистаналъул Журналистазул союзалъул председателас.

Хадув кIалъазе вахъарав журналист, Дагъистаналъул пачалихъияб университеталъул преподаватель Алик ГIабдулхIамидовас бицана рехсараб махщалил гIадамазде республикаялда кидаго букIараб тIадецуялъул ва кинаб ахIвал-хIалалде кканиги, Дагъистаналъул журналистал тIаса бищараб махщалие ритIухъаллъун хутIиялъул. "Нилъеца гьаниб бицен гьабулел журналистаз гIумру кьуна жакъасеб къоялъе гIоло. Амма гьезул щивасулги рукIаралха кIудияб хIалтIи-хъулухъ, бечелъи тIалаб гьабизе ресал. Гьез гьеб тIаса бищичIо. Гьел хутIана жидерго къалмие мутIигIаллъун, гьерсида данде рагъ лъазабураллъун. Гьединаллъун рукIине ккола нужги. РитIухълъи ахир-къадги бергьине буго", — ян абуна гьес.

"Новое дело" газеталъул бетIерав редактор Сагитов ХIажимурадица бицана журналистал халкъалъул матIу кколин ва гьеб чорок гьабизе къеркьолел камулел гьечIин. "ГIемер бицунин, данделъаби тIоритIунин абун чIварал журналистал нилъехъе тIадруссун рачIинаро. Амма, ракIчIола, гьадинал тадбирал цIикIкIун тIоритIани, чIвадарухъаби нилъедаса хIинкъизе руго, ва такрарлъизе гьечIо гьединал такъсирал. Нилъ руцIцIун чIун ругебгIан заманалда щибго хисизе гьечIо. Щивав чияс хIаракат бахъизе ккола жинди-жиндир пикру загьир гьабизе, ихтияр цIунизе ва законалда рекъонкколеб къагIидаялда нухмалъиялдасаги ритIухълъи тIалаб гьабизе. Гьеб гьедин гьечIони, метерисеб къо захIматаблъун букIине буго".
Данделъиялда кIалъазе вахъарав Дагъистаналъул халкъияб магIишаталъул университеталъул ралел бакIазул факультеталъул декан МухIамад МухIамадовас гьадин бицана: "Жакъа ракIалдещвезарулел журналистал рукIана унго-унгоял бахIарзаллъун. Нилъералин, чияралин ратIа гьаричIого, гьез хIаракат бахъулаан гIадамазе, жамгIияталъе кумек гьабизе, гьезул тIалабазухъ гIенеккизе. Гьединал чагIи кидаго рукIана Дагъистаналда ва жакъаги руго. Гьаниб бицана такъсирал жеги рагьун гьечIин. Рагьилищха, жалго хIакимзаби, низам цIунулел идарабазул хIалтIухъаби ругелъул гьеб чороклъиялда гъорлъ", — ан.

Россиялъул халкъазул ассамблеялъул регионалияб отделениялъул председатель Зикрула Илясовас бицаралда рекъон, журналистасда цебе лъураб аслияб масъала ккола жамгIияталда гьоркьоб ахIвал-хIал роцIинаби, гьелъулги нухмалъиялъулги бухьен щула гьаби. "Гьединал, республикаги жамагIатги бокьулеллъун рукIана жакъа нилъеца ракIалдещвезарулел журналистал. Амма гьединаб лъикIаб, чIара-хьараб ахIвал-хIалги, парахатаб гIумруги бокьуларел, данде кколарел чагIиги камулел гьечIо. Гьединаз питна бекьулеб, рикьалаби ккезарулел руго республикаялда. Гьезда данде къеркьезе ккола нилъ, хасго нуж, гIун бачIунеб гIел", — ан абуна Зикрула Илясовас.
Ахиралда данделъаразда бихьизабуна "РагIи ва Гулла" абураб, чIварал журналистазул хIакъалъулъ бахъараб документалияб фильмги.
Темирхан ХIасанов