24 ноябралда тIобитIана ДРялъул Халкъияб Собраниялъул анлъабилеб ахIиялъул лъабабилеб сессия. Гьеб рагьана ва нухда бачана спикер Хизри ШихсагIидовас. Сессиялда гIахьаллъана ДРялъул бетIер Рамазан ГIабдулатIипов, Пачалихъияб Думаялъул цо-цо депутатал, республикаялъул хIукуматалъул идарабазул вакилзаби.

Байбихьудаго, заман щвелалдего ДРялъул Халкъияб Собраниялъул депутатасул хIалтIи гьоркьоб къотIизе тарав Сулейман Керимовасул мандат кьуна цIивищарав депутат Муслим ИсмагIиловасухъе. Гьелдаса хадуб щибаб фракциялъул вакилзабаз бицана халкъалъул унтарал суалазул.

КПФРалъул вакил, ДРялъул Халкъияб Собраниялъул председателасул заместитель МахIмуд МахIмудовас абуна цIирищарал депутатал хIалтIизе ккелин кIвахIтун, гIадамазул мурадал тIуразари тIадаб иш букIин кIочене течIого.

"Цогояб Россия" фракциялдаса депутат Висампаша Ханалиевас ракIалдещвезабуна МахIачхъалаялда лъим чороклъиялдалъун ккараб чехь-бакьазул инфекциялъул масъала. Гьелда бан "Миякьо-МахIачхъала" мухъалда лъел рогIрал лъун рахъинаризе кколин абуна гьес.
Сессиялда гьоркьоб лъуна 30 суал. Гьезда гьоркьор рукIана "Ришватчилъиялде данде", "Халкъияб Собраниялъул депутатасул статус", "ДРялъул Халкъияб Собраниялъул комитетал" бутIабазул законазулъ хиса-басиял гьариялъул хIакъалъулъ ва цогидалги кIвар бугел суалал.
"РФялда ругел Россиялъул халкъазул маданияб ирсалъул объектазул (тарихиял ва маданиял памятникал)" абураб, маданияб ирс цебетIезабиялъул ва цIуниялъул мурадалда цIияб агентство гIуцIиялъулги бицана. Хиса-басиял гьаруна "ДРялъул гражданияб хъулухъалъул" ва "ДРялъул муниципиалиял хъулухъал" законазулъги.

65 соналде щвезегIан бихьизабуна пачалихъияб хъулухъалда рукIине бегьулезул ригь, цебе 60 сон гурони букIинчIо.
Аслияб суаллъун букIана 2017 соналъул, ва 2018-2019 соналги хIисабалде росун, бюджет къабул гьаби.

ХIукуматалъул председателасул заместитель, ДРялъул экономикаялъул ва социалияб цебетIеялъул министр Раюдин Юсуповас бицана бюджеталда рекъон экономика цебетIезе бугин 3-4 проценталъ. РакIалда бугин киналго социалиял тIадеросиял тIуразаризе, школазда лъабго сменаялда цIалулеб къагIида тIагIинабизе ва ичIго школа бан лъугIизабизе, нухал къачIаялде жеги цIикIкIун гIарац биччазе.

Финансазул министрасул заместитель Темирлан Расуловас бицана федералияб бюджеталдаса республикаялъул бюджеталде гIарац бачIун гьечIин, гьединлъидал захIмалъабиги дандчIвалел ругин цо-цо хIалтIаби гьарулаго.

ДРялъул финансазул министр ЖахIбаров Билалица бицана 2017 соналда къабул гьабизе бугеб ва 2018-2019 соналда хIисабалде босараб республикаялъул бюджеталъул хIакъалъулъ.

"2017 соналда 72 миллиардгун 454 миллионгун 273 азарго гъуршил (доходазул) бюджет къабул гьабуна Халкъияб Собраниялъул тIоцебесеб цIалиялда. Гьелда гьоркьоса 70, 816 миллиард гъуруш харж гьабизесеб ва миллиардгун 637 миллион гъуруш профицит, бюджеталда хIалтIизабизе кколелдаса тIокIлъараб гIарац ккола", — ян бицана Билал ЖахIбаровас.

Федералияб бюджеталдаса гIарац бачIун хадуб бюджеталда хIалтIизабулелдаса тIокIлъизе бегьула лъабго миллиард гъуруш.

Халкъияб Собраниялъул бюджеталъул, финансазул ва налогазул комитеталъул председатель Сейфулагь ИсхIакъовас бицана, цебего гIадин тIасияб соналъги бюджеталдаса цIикIкIараб къадаралда биччалеб гIарац хIалтIизабизе бугин социалияб рахъ цебетIезабиялде.
2017 соналъул бюджет къабул гьабуна, 72 депутатас гьелъул рахъги ккуна.

Сессиялъул ахиралда ДРялъул Халкъияб Собраниялъул кIиго депутатас жидеего бокьун, заман щвелалдего депутатлъиялъул мандатал нахъе кьуна. Гьел ккола Халкъияб Собраниялъул экономикаялъул, инвестициязул ва предпринимателазулал ишазул комитеталъул председателасул заместитель Альбина АхIмадова ва гьебго комитеталъул вакил ГIали МухIамадов.
ПатIимат СултIанмухIамадова