ЦIа рекIана радал сагIат 10:30 тIубараб гIужалда. Бакъанил гIужалде цIа свинабун бажарана. Минабиги рухIун, 480 чи къватIив хутIана. Гьезда гьоркьоб буго 190 лъимерги. ЦIадул балагьалдалъун минабаздаса махIрумлъарал гIадамазе мадугьалихъ бугеб Цебари росулъ школалда рега-рахъине санагIат гьабуна. Гъоркьисала гьеб росуги бухIун букIана.

"ЦIа свинабизе рачIана республикаялъул МЧСалъул, Болъихъ ва Шамил районазул цIа свинабулел къокъаби. Жигаралда хIалтIана гьенир Кидеро росулъа пожарникалги. Дагъистаналъул МЧСалъул 124 хIалтIухъан ва ункъо машина гIахьаллъана цIа свинабиялъулъ. Кинабниги 19 машина ва 197 чи вукIана гьенив хIалтIулев. Россиялъул Жанисел ишазул министерствоялъул Ми-8 ва Россиялъул МЧСалъул СКРЦалъул вертолеталги хIалтIизаруна. ЦIа свинабулел рукIана ЦIунтIа РОВДялъул киналго хIалтIухъабиги", - ян хъвалеб буго ЦIунтIа районалъул официалияб сайталда.
Балагьалде ккарал гIадамазул ахIвал-хIал лъазабизе ЦIунтIа районалде ун рукIана ДРялъул хIукуматалъул председателасул заместитель Жапаров Рамазан ва регионалияб МЧСалъул нухмалъулев КазимухIамадов Нариман. "Республикаялъул нухмалъиялъул вакилзаби рещтIана Гьинухъ габурлъиялда. Гьенире гьезда дандчIвазе ун букIана районалъул бетIерасул къокъа. Къварилъи ккаразул сияхI мухIкан гьабулеб буго гьабсагIаталда. Гьезие квен-тIех, заманалда жанир рукIине чадрал, ургал ва щибаб къойил чара гьечIого хIажатал жал рачIине байбихьана росулъе", - ян бицана Мокъокъ росулъа МухIамадов ХIусен-апандица.

ХIусен-апандил мина букIана росу бакьулъ. ГIемер лъимал ругеб гьесул хъизан хIебтIулаан умумузулго букIараб цIигьабураб минаялъуб. Жиндирго гIадин хьихьана гьес гIолохъанго хварай яцалъул васги ясги, вузалда цIализаруна ва гьел рукъалде руссинаруна. Жеги школалда цIалулел руго гьесул жиндирго лъималги. Каникулазул заман бугелъул, лъадиги лъималги гIатIиракьалде ритIун, бищун гьитIинай ясгун рокъов вукIун вуго гьев росу бухIараб къоялъ. Мадугьалзабазул минаялда рекIараб цIа свинабизе арав ХIусен-апанди жиндирго мина хвасар гьабизе регIичIо. Киналдасаго махIрумлъана гьев: гьечIо жанив вукIине рукъ, ретIине партал, документал, умумузул ирсалъул хутIараб лъалкIго...

Токалъул хIободаса

Росу бухIиялъе гIилла гьадинаб батизе бегьулин абуна МухIамадов ХIусен-апандица нижеда: "Цо къоялъ цебе, ай 20 августалда, Махъалалъе унеб букIана харил туказул цIураб КамАз. КъватIахъан гьунарого букIун, гьеб хъван букIана токалъул хIубиялда. Гьелъул хIасилалда хIуби жагъаллъун букIана ва машина бачунев вукIарав чияс абун букIана тIадвуссиндал жинца гьеб къачIазе бугин. Амма гьеб къачIазе шофер вачIинчIо, цогидав чиги гьелде регIичIо. 21 августалда сагIат 10 тIубалеб гIадаб заманалда гьури бахъана. Гьеб гьороца доб бегизе къачIан букIараб хIубиги хьвагIезабиларищха. Гьелда рарал токалъул кварал цоцада хъвана ва цIа рекIана ГIалиев ГIумарасхIабил минаялда. БежтIа райцентр бугеб заманалда районалъул пожарниклъун хIалтIарав чи вуго ГIумарасхIаб. Бакъвараб цIулада рекIараб цIа хехго свинабизе бажаричIо ва рукъалъул хважаинги тIаде балагьун гьесул мина цIадулъ тIерхьана. Гьороца хехго тIибитIизабуна цIа ва гьелъ "кваназе байбихьана" мадугьалихъ ругел минаби.
Кумекалъе рачIана Болъихъа, Шамил районалдаса ва Кидероса цIа свинабулезул къокъаби. КватIичIого эхесаги кумек тIаде щвана. Амма цIа свинабулел машинаби цIадуде гIагарлъизе бажарулеб хIал гьечIолъиялъ минаби хвасар гьаризе квалквал гьабуна. БежтIаса, Кидероса ва цогидал росабалъа гIолохъабаз пожарниказухъа лъел рогIралги росун, жидерго гIумруялъе хIинкъи букIинги кIочон тун, цIакъ жигар гьабуна цIа свинабизе. Гьезие кIудияб баркала буго - гьединаб кумек щвечIебани, рохьалдаги цIа рекIиналъул хIинкъи букIана".

Мокъокъ росдал
83 мина бухIана

Аллагьасул квербакъиялдалъун цониги чиясул сахлъиялъе зарал ккечIо. МагIишатни цIигьабизе бегьила, амма жамагIаталъул кумек щвечIони, гьеб иш захIмалъила. Минаялда цадахъ рухIана гьорал-бокьал, гьениб хасалоялде хIадурун букIараб рагIи-хер, цIул. Щибаб хъизамалъ хасалоде босун букIараб 6-7 тонна тIорччолги рахъу лъугьана. Заманалда жанир рукIине гIадамазе хъорщол рукъзал кьелин рагIи кьун буго РФялъул Пачалихъияб Думаялъул депутатлъиялде кандидат МухIарамов ГIабдулмажидица (гьевги вачIун вукIун вуго къварилъи ккарал цIунтIадерихъе).
Пачалихъалъ кумек гьабичIого гIадамал рехун теларо. Амма гьеб кумек заманалда щвеялда щаклъи буго. 2014 соналъул 19 апрелалда бухIана Гьинухъ росу, амма гьезие жеги кинабгIаги кумек щвечIо ва гьелъул бицун гьаб соналъул июлалда кумекалдаса махIрумлъарал Гьинухъ росдал гIадамал МахIачхъалаялъул аслияб майданалда ракIарун рукIана. Аслияб масъала документал гьечIолъиялда бан тIубазабизе захIмалъулеб бугин бицунеб букIана гьеб мехалда. Минабазул хъвай-хъвагIай гьабурал росаби магIарухъ къанагIат гурони ратуларо. Гьебго гIиллаялда бан кумек кватIизе бегьула мокъокъдериеги.
Гьединлъидал, жакъа къватIир хутIарал гIадамазе сундалъун гьабуниги, кумек хIажат буго: ретIел-хьит, квен-тIех, бусен-къайи - гьеб кинабго бакIаризе Сбербанкалда хасаб счет рагьун буго "Инсан" рахIмуялъул фондалъ. ГIарцул кумек гьабизе бокьарав чияс гьеб битIизе бегьула Сбербанкалъул гьал счетазде: 4276 6000 1740 6196; Яндекс-деньги: 410011758534858; БИЛАЙН: 8 (909) 480 88 88. Суалал кьезе бегьула гьаб номералдеги кIалъан: 8 (909) 480 88 88 (ГIумархIажиев ХIажимурад).

Автор: Кавсарат Сулейманова