РФялъул СахлъицIуниялъул министерствоялъул баяназда рекъон, улкаялъул халкъалъул 60-80 проценталъе щолел гьечIо хIажатаб къадаралда витаминал.

Масала, С витамин гIолеб гьечIони, черх загIиплъула, дабаздаса би бачIуна, квачалъул унтабаз гIемер унтула. А витаминалъул гIунгутIи букIиналъул бицуна беразул цIа-кан бахиналъ ва багIарлъиялъ, канлъи дагьлъиялъ. D витамин гIолеб гьечIони, кариес лъугьуна, рищалаби ва бохдул унтула, къу­ват дагьлъула, гIетI бала, ццида­ххун лъугьуна. Е витамин гIолеб гье­чIони, беразда гъоркь бакIал бецI­лъула, дабаздаса би бачIуна, ччорбал загIиплъула. В витамин гIолеб гье­чIони, батIи-батIиял унтаби раккизе бегьула. В1 витаминалъул гIунгутIи бугони, тахикардия ккола. В2 витамин щолеб гьечIони, кIал­зул бокIназда ругънал лъугьуна, В3 ¬ — бетIер свери цIикIкIуна, В6 — макьу щоларого рукIуна, В9 — кIалдиса рокьукъаб махI бахъуна, В12 — бетIер унтула.

Авитаминозалдаса цIуни
Сахаб ва рекъараб квен кунеб бугони, гIураб къадаралда витаминалги щола. Хасало, булкабазул ва макароназул бакIалда кваназе ккола витаминал ва минералал гьоркьор ругел нигIматал. Карщ кваназе ккола гречкадул, нихадул, богIол ханждал. Кваназе лъикIаб буго ччугIа, гIурччинхер, пихъ ва овощал. ГIисинпихъалъ, соказ ва мурапаялъ чорхое пайда гьабула. Нахърателалъе гьарурал цIамхIалал нигIматазулъ кинал ругониги пайда бугел витаминал рукIунаро.

С витамин гъорлъ бугел нигIматал ккола гъарцIи, чIегIераб смородина ва гIинтIи. ГIинтIиялъул тIокIкIел гьабулаго бегьуларо гьелде тIаде бухIараб лъим тIезе яги гьализабизе. Гьелъ С витаминалъул пайда хвезабула. ЛъикIаб буго пурчч, хилъало ва цитрусал кванилъ хIалтIизаризе. Картошкадулъ букIуна С витамин ва чорхое къваригIунел крахмалгун углеводал. Чорхолъ кальций цIуниялъул жаваб кьолеб аслияб компонентлъун ккола D витамин. Остеопороз лъугьине биччаларо D витамин гъорлъ бугеб квен кваналеб бугони. КъваригIараб къадаралда D витамин щола щибаб къоялъ бакъалда чIолел ругони, кванилъ ханал, треска ччугIил тIул ва беэнаб тайпадул ччугIа хIалтIизабулеб бугони. Бакъвараб пихъилъ букIуна А витаминалъул провитамин ва В витаминазул гIемерисел тайпабазул рекъа­раб нахърател.

Бищунго пайдаял
Холодильникалъур цIунарал салатазул ва винегретазул заман банагIан пайда хола. ГIисинго руссарал овощазулъаги хехго хола витаминал. Овощал гIисинго руссун гьабулеб квен бугони, гьеб гъорлъе лъим тIечIого яги дагьаб тIун гьабизе лъикIаб буго. Витаминал цIунун хутIула тIаса хъал бахъичIого релъарал овощазулъ.

КигIанго лъикI кваналел ратаниги, щибаб заманалда рекъон рижулел нигIматал ва гьединго батIи-батIиял витаминал гъорлъ ругел дараби гьекъезе бегьула. С витаминалъул гIураб къадар чорхолъ букIинабизе ккани, щибаб къоялъ 12-15 цитрусазулал нигIматал кванан хIалкIоларо. Гьединлъидал пайдаяб гурони квен кванаге, кванай жиндир заманалда ва гIураб къадаралда. Гьебмехалда авитаминозалъ чорхое зарал гьабуларо.
Камиля Халилова, республикалъул медпрофилактикаялъул централъул тохтур