ИчIабилеб июлалда 32 сон барав НурбахIандов МухIамад ва 23 сон барав гьесул вацгIал ГIабдурашид гIагарлъиялда цадахъ хIухьбахъизе рохьоре ана. Сергохъала росдадаса кIиго километралъ рикIкIад бугеб рохьил рацIцIалъиялда тIубараб къоялъ рекIелгъеялдаги рукIун, бакъанил гIужалде цадахъ рукIарал бихьинал ва руччаби рокъоре тIадруссана. НурбахIандов МухIамад, гьесул вацгIал ва гьезул гIисинал вацал (бищун гьитIинав вукIана лъабабилеб классалъул цIалдохъан) рохьор сордо базе чIана. Къаси чадирги чIван кьижун рукIарал гьел рогьалилъ сагIат щугоялде бащдаб хIалтIараб гIужалда хъачIал гьаркьаз макьидаса рорчIизаруна. Гьезда тIаде ккун руго рохьосан унел рукIарал хъачагъал.

Рохьосан рачIунаго, ункъо хъачагъасда бихьун буго чадир ва гьелда аскIобго "Мерседес-Бенц" ва "Лада Приора" машинаби. Цоялда жанив кьижун ватарав бихьинчиясда тенкон руго гьел ва хадубккун киналго рорчIизарун руго жидее машина къваригIун бугинги абун. РорчIизарурал бихьиназухъа телефонал рахъун руго ва гьел гъурун руго. "Лада Приораялъул" цIурдул гъурун руго ва гьелдаса магнитолаги бахъун, бекун буго.

10 сон барав вацасда малал ралеб бихьидал, НурбахIандов ГIабдурашид гьесда нахъасан вахъана ва гьеб сабаблъун гьесде лъабцIул кьвагьана хъачагъаз. "Mercedes-Benzалъул" хал-шал гьабулаго, хъачагъазда гьениб батана НурбахIандов МухIамадил полициялъуласул, ай ведомствоялъулаб гуреб хъаравуласул удостоверение. ХIухьбахъиялда рукIарал гIолилал хъачагъаз рухьана ва машинаялде рахинаруна. ЧIварав ГIабдурашид ва МухIамад НурбахIандовал гьез багажникалъур къазаруна ва киналго рохьоре рачана", - ян хъвалеб буго РФялъул ЦIех-рехалъул комитеталъул баяналда. Туристал рукIараб бакIалдаса километралъ рикIкIалъидал, цояв хъачагъас МухIамадил ботIролъ таманча речIчIана. Гьелдаса хадуб рохьобго машинаги тун, хъачагъал гьениса лъутана.

Избербашалдаса Сергохъалаялде

Сергохъалаялдаса 32 километралъ рикIкIад буго Избербаш шагьар. Шамат къоялъул сардилъ Избербашалъул цо къотIноб живго бетIергьанаб машина чIезабуна ункъо чияс. Жаниреги рахун, жал Сергохъалаялде щвезареян гьарана гьез. Гьел чагIазул хабар-гIамал рекIеего гIечIев шоферас машинаялъуса къватIире лъугьаян тIалаб гьабуна. Амма пассажираз, ярагъги къватIибе бахъун, шоферасе хIинкъи кьуна ва гьевги багажникалъув къазавун, Сергохъалаялдехун нух босана. Нухдасан шоферасухъа багажникалъул тIалъел рагьун бажарана ва гьев гьениса къватIиве ворчIана. Хъачагъаз машина чIезабичIо ва рохьил рагIалде щведал машинаги рехун тун, рохьорехун ана. Гьенир гьел тIаде ккана кьижарал туристазде.
ЦIех-рехалъул пикруялда, Избербашалдаса машина хъамун арал ва НурбахIандовал чIварал хъачагъал "Избербашалъул террористазул къокъаялъул" гIахьалчагIи кколин рикIкIунеб буго следователаз.

Гьеб такъсирияб къокъаялъул бетIерлъун низам цIунулел идарабаз рикIкIуна МухIамадов Камил. 2011 соналъул 11 июналъул сардилъ Гъарабудагъкент районалда хасаб операция тIобитIулаго, гьев чIвана. Москваялъул Кузьминки районалда такъсир гьабиялъул бетIерлъунги гьев кколин абулеб букIана ФСБялъ. 2010 соналъул 31 декабралда Москваялъул рехсараб районалъул Головачевасул къотIноб бугеб "Объект" кьвагьдохъабазул клубалда кьвагьи бахъана ва гьелда цIа рекIана. ЦIех-рехалъ чIезабуна гьениб жидецаго гьабураб кьвагьулеб алат хIалтIизабураблъи. ЦIа ккараб бакIалда батана гIолохъанчIужуялъул жаназа. Хадубккун гьей Давудова Завжат йигин ва гьей хъачагъасул лъади кколин чIезабуна. Такъсир гьабиялъул мурадалда Кузьминкиялъул паркалда гьалбадерил бакIалда рукъги ккун, Давудовалъе хасаб телефонги босун букIун буго. Гьеб телефоналде СМС-кагъат бачIине кколаан ва телефоналъул гьаракь бахъиндал, кьвагьулеб алатги хIалтIизе кколаан.

БахIарчияб хвел

Интернеталда лъун буго НурбахIандов МухIамад хъачагъаз чIваялъул бахъараб видео. ХIалтIи рехун тейин абун низам цIунулел хIалтIухъабазде хитIаб гьабеян тIалаб гьабулеб буго гьесдаса хъачагъаз. Амма МухIамадица гьезул мурад тIубазабичIо. "ХIалтIе, вацал!" - ан абуна гьес хвалда цебе. Полициялъул гьитIинав лейтенант НурбахIандов МухIамадида лъалаан жиндир гIумруялъул ахирисел лахIзатал рукIин. Амма гьев къуркьичIо хъачагъасул тIалабалъе. Жив чIаго хутIиялъул хьулалда тушманасе хIеличIо. БахIарчияб хвел тIаса бищизе хIадурал бихьинал Дагъистаналда жеги рукIин бихьизабуна гьес.
Офицерасул бахIарчияб ишалъе нугIлъи гьабулеб видео дагьалъ цебе щвана низам цIунулел идарабазул хIалтIухъабазухъе. Гьеб батана хасаб операция тIобитIулаго. Дол хъачагъал чIвана. Россиялъул ФСБялъул ЦСНалъул хIалтIухъабаз Интернеталда лъуна дол хъачагъал чIвараб спецоперациялъул видео-материал. "ХIалтIулел руго, вац...", - ан абулеб бугоан гьелда ФСБялъул хIалтIухъабаз...

Мисалиявлъун вукIана... Мисаллъун хутIана

"Сергохъалаялъул №2 лицеялда цIалана НурбахIандов МухIамад. Дидаса ункъо соналъ кIудияв вукIана гьев. Гьев вукIана жигарав, щуйилазда цIалулев вас. КВНалъул къокъаялъул нухмалъулевги вукIана гьев. Гьесул къокъаялъ районалъул къецазда бергьенлъаби росана чанцIулго. ТIокIлъиялда лъугIизабуна лицейги. ЦIакъ лъикIав, гIадамазулъ жуварав вас вукIана гьев. Хвалда цебе гьес абурал рагIабаз гьесул ва нилъер халкъалъулго бахIарчилъи, бихьинчилъи ва къвакIи бихьизабула. Нилъ тушманасда къуркьизарун бажарунгутIи бичIчIизабула.
Экстремистазул вахIшиял ишаз чанги къварилъи бихьизабуна Сергохъала районалъул гIадамазда. БукIана экстремистаз жигараб багъа-бачари гIуцIараб заман ва гIадамазе гьелъул гIемераб заралги ккана. ГIезегIан мехалъ парахат букIана район, ракI гIагализарулел лъугьа-бахъиназдаса эркенлъун рукIана ниж. Гьединлъидал, хъачагъазул нахъегIанаб лъугьа-бахъиналъ щивасул рекIее захIматаб асар гьабуна. "Россиялъул БахIарчи" абураб цIаралъе мустахIикъав вугин гьевин рикIкIуна нижер гIолилаз. Сергохъалаялъул цо къватIалда гьесул цIар лъезе ва гьесул рукъалда мемориалияб хъарщи чIвазе кколинги пикру загьир гьабуна", - ян бицана Сергохъала районалъул газеталъул бетIерай редактор ГIаликберова ПатIиматица.
НурбахIандов МухIамадие "Россиялъул БахIарчи" абураб цIар кьеян Россиялъул президентасде хитIаб гьабизе бугин хъвана Дагъистаналъул бетIер ГIабдулатIипов Рамазаница Instagramалда. "Унго-унгояв бахIарчи, кьураб гьаялъегун ватIаналда цебе тIадаб борчалъе ритIухъав офицер жив вукIин бихьизабуна НурбахIандов МухIамадица. РФялъул президентасда нижеца гьаризе буго гьесие "Россиялъул БахIарчи" цIар кьеян.

ВатIан ва офицерасул мундиралъул къадру цIунулаго хварав унго-унгояв бахIарчи даим хутIила бихьинчилъиялъул ва ватIан бокьиялъул мисаллъун. Гьес киназдаго бихьизабуна нилъ хъачагъазукьа хIинкъулареблъи, нилъ гьездаса тIадегIанал ва къуватал рукIин. МухIамад гIадал гIолилазул хIаракаталдалъун нилъеца парахатаб гIумру гьабулеб буго республикаялда. Гьединав бахIарчияв вас гIезавурал эбел-инсуе, гьесие тарбия кьурал педагогазе ва ишцоязе баркала кьола дица Дагъистаналъул тIолабго халкъалъул рахъалдасан", - абун хъван буго гьениб.
Россиялъул МВДялъул вакил Ирина Волкица абуна бахIарчиго хварав Дагъистаналдаса полициялъул гьитIинав лейтенантасул эбел-эменгун дандчIвазехъин ругин МВДялъул нухмалъулел. НурбахIандов МухIамадие пачалихъияб шапакъатги кьезе бугин абуна гьелъ.
Муса Азаев "ХIакъикъат"