Ставрополь краялда байбихьана Дагъистан Республикаялъул къоял кIодо гьариялъул байрам.

Гьеб рагьиялъул тадбиралда бихьизабураб концерталда гIахьаллъана лъабго ансамбль: Пачалихъияб академикияб кьурдул мустахIикъаб "Лезгинка", "Дагъистаналъул гIолохъанлъи", "Хасавюрт"; "Дагъистан" ансамблялъул вокалистазул къокъа, Азербайжаназул, ЛъарагIазул, Тумазул, Лезгиязул ва ГIурус театразул актерал ва машгьурал кочIохъаби: ГIабдула МухIамадмирзаев, Айдун МухIамадов, Лариса ХIажиева, Зайнаб Махаева, Амина Гунашева, Сафи Султанова, МухIамадрасул Рабаданов ва цогидал. Концерт нухда бачана машгьурав шоумен Карен Мкртчяница. Балагьаразе кIудияб асар гьабуна палугьан Мугудин Сайдиевасул гьунаралъ.

"Ставрополалда Дагъистаналъул къоял" байбихьиялъул хIурматалда букIана "Ставрополье" абураб хъазахъазул кьурдул ва кочIол ансамблялъул церерахъинги.

"Дир Дагъистан"

Гьединаб цIаралда гъоркь Михаил Лермонтовасул цIаралда бугеб Ставрополалъул универсалияб гIелмияб библиотекаялда гIуцIун буго Дагъистаналъул халкъияб устарлъиялъул алатазул ва хъвадарухъабазул тIахьазул выставка. Гьенирго рихьизарулел рукIана республика цебетIезабиялъул мурадалда хIадурарал аслиял проектал ва туризмалъе ругел ресазул хIакъалъулъ презентациял.

Библиотекаялда рагьараб выставкаялъухъ балагьизе щвана ДРялъул бетIер Рамазан ГIабдулатIиповги. Мадугьалзабазулгун бухьенал щулалъизаризе жигар бахъулеб бугин Дагъистаналъинги абун, гьес гIатIидго бицана туристазе санагIатал бакIазул ва цадахъал проектал хIадуризе ругел ресазул хIакъалъулъ. "Экологиялъулаб ва чанахъанлъиялъулгун ччугIихъанлъиялъул туризм цебетIезабизе ресал руго нижер. Нужеда бихьила Дагъистаналъул халкъазул гIадат-гIамалги рукIа-рахъинги кинаб букIарабали. Нижер руго къанагIатал тIабигIиял памятникал, масала, Сарыкум — салул гохI, Хучни росулъ чвахело, Сулахъалъул къварилъи, Самуралъул рохь, ГIандадерил ралъад… Дагъистан ккола бацIцIадаб зодикь рагьараб музей", — ян абуна Рамазан ГIабдулатIиповас. ТIолгодунялалъул ирслъун лъазарурал памятниказда гьоркьобе унеб 6,5 азарго памятник бугин Дагъистаналдаян тIадеги жубана гьес.

Дандеруссин тIобитIана

"Северияб Кавказалда хIинкъи гьечIолъи цIуниялъе кьучI хIисабалда Ставрополь краялъул ва Дагъистан Республикаялъул регионазда гьоркьосеб бухьен" абураб цIаралда гъоркь тIобитIараб дандеруссиналда бицана Россиялъул югалда чIара-хьараб хIал букIинабиялъул мурадалда кIиябго регионалъ гьабулеб хIаракаталъул хIакъалъулъ. Гьениб Дагъистаналъул бетIерас бицана ахирал соназда мадугьалихъ ругел къватIисел улкабазулгун регионалъул ккарал экономикиялги, политикиялги ва культуриялги бухьеназул хIакъалъулъ.

"Жакъасеб геополитикияб хIалалъухъ балагьани, Дагъистан лъугьун буго Россиялъул югалда бугеб аслияб хъаравуллъун. Азербайжан, Гуржистан, Казахстан, Туркменистан ва Иран — нижер республика буго гьел улкабазул гIорхъода. Гьединлъидал, миллиялги, диназда ва регионазда гьоркьоселги бухьенал гIуцIиялъулги, радикализмалдеги, экстремизмалдеги ва терроризмалдеги данде къеркьеялъулги рахъаз пачалихъияб политика гIумруялде бахъинабулаго, регионалъул хаслъи хIисабалде босизе тIадаб буго", — ян бицана Рамазан ГIабдулатIиповас.

Гьес ракIалдещвезабуна Ставрополь краялъулги Дагъистаналъулги халкъазда гьоркьоб вацлъиялъул бухьен кидаго букIараблъи.

Ставрополь краялъул миллиял ва хъазахъазул ишазул комитеталъул председателасул заместитель, Терекалъул хъазахъазул бодул атаман Александр Журавскиясги Ставрополь краялда вугев ДРялъул вакил ГIабдула ГIумаровасги бицана кIиябго регионалъул пачалихъиял идарабазул бухьеназул хIакъалъулъ.

Дандеруссиналъул ахиралда Рамазан ГIабдулатIиповас ДРялъул гIолилазул ишазул министрасда тIадкъана Ставрополалдаса 100 гIолилав хIухьбахъизе Дагъистаналде ахIеян. ГIахьалчагIазул суалазе жавабалги кьуна гьес.