Ставрополь краялъул губернатор Владимир Владимиров ва ДРялъул бетIер Рамазан ГIабдулатIипов дандчIвана 18 апрелалда. Гьез бицана цадахъ гIумруялде рахъинаризе бегьулел проектазул хIакъалъулъ.

Масала, Азербайжаналдаса Ставрополалде балеб буго маххул нух. Гьелъул мурад буго Ставрополь краялъулги Ираналъулги бухьенал гьари. Гьеб проекталда Дагъистанги гIахьаллъизе бегьулаян абуна Владимир Владимировас. Дагъистаналъ гIумруялде бахъинабуна проектазулаб нухмалъи. Гьеб гьанже гьабизехъин буго Ставрополь краялдаги. Гьеб рахъалъ нилъер республикаялъул бугеб хIалбихьиялдаса пайда босизехъин бугинги абуна губернаторас. Гьелъул мурадалда Дагъистаналде вакилзаби ритIизе ракIалда бугинги бицана гьес, хъвалеб буго "ХIакъикъат" казияталда.

"Нилъ мадугьалзаби ккола, нилъ руго вацал. Дагъистан ва Ставрополь цолъун гьечIони, биххизе буго кIудияб улкаялдаго гIадлу. Киналго халкъал лъикIал руго ва халкъазул бищун лъикIал вакилзабазул гьудуллъи бугони, гьелъул лъикIлъи киназдего бахуна. Цоцазул адаб-хIурматги гьабун, хIалбихьиялдаса пайдаги босун, цебетIеялъе нухал ратизе тIадаб буго нилъеда.

Нижее бокьун буго инвестициял рачIинариялъул рахъалъ Ставрополалдаса мисал босизе, гьединаб хIалбихьиялъулгун лъай-хъвай гьабизе", — ян абуна Рамазан ГIабдулатIиповас.

ДандчIваялъул ахиралда Дагъистаналъул ва Ставрополь краялъул хIукуматазда гьоркьор экономикиял ва дармил, гIелмиялгун техникиял, социалиялгун маданиял бухьенал щулалъизариялъул хIакъалъулъ къотIи гьабуна.

ДандчIваялдаса хадуб кIиябго регионалъул бутIрул ана Ставрополалъул перинаталияб централде. Гьенир руго 130 лъимадуе бакI бугеб стационар ва батIи-батIиял отделениял.