ГIахьвахъ районалъул администрациялда тIобитIана гIолилазул форум. Гьелъул хIаракатчи МухIамад ГIабдулаевас бицана исана тIолабго дунялалъул гIолилал гIахьаллъараб гьединаб фестиваль Сочиялдаги тIобитIизе бугин. Хадуб гIолилаз ва тIаде рачIарал гьалбадерица тIугьдул лъуна Совет Союзалъул БахIарчи МухIамад-Загьид ГIабдулманаповасул памятникалда цере.

Щвана Машидат Гъайирбеговалъул музеялдеги. Цинги республикаялда цIалдохъабазда гьоркьоб тIобитIараб шахматал хIаялъул чемпионаталда бергьараб командаялъул тренерал, ТIадмагъилъ росдал школалъул мугIалимзаби Марина ГIисалмухIамадовалъе ва ГIали ГIалиевасе кьуна ХIурматалъул грамотаби, гIарцулал сайгъатал.

Грамотаби щвана цересел бакIал ккурал шахматистазеги ва "ГIолохъанал цIалдолел" абураб Хунзахъ тIобитIараб къецалда бергьарай КIаратIа школалъул цIалдохъан П. Халидовалъеги.
Бадрудин СултIанов