Данделъун рукIана чIварал журналистал ракIалдещвезаризе. 21 декабралда Журналистазул рокъор ракIарун рукIана республикаялъул СМИязул бетIерал редакторал, чIварал журналистазул гIагарлъи, гьудул-гьалмагълъи ва журналистал. Гьениб бицана, тIадаб хъулухъалъулаб борч тIубалаго, чIварал журналистал ракIалда цIуниялъул мурадалда гьезие памятник базе ккеялъул хIакъалъулъ.
ДРялъул Журналистазул союзалъул председатель, "ХIакъикъаталъул" бетIерав редактор ГIали Камаловас абуна памятникалъул макет хIадурун бугин ва гьеб базе гIарац балагьулеб бугин. "Памятникалъул борхалъи букIине буго 16 метр ва гьеб букIине буго журналистазул бихьинчилъиялъул, бахIарчилъиялъул ва ритIухълъиялъе гIоло къеркьеялъул гIаламатлъун. Дагъистаналъул бетIер Рамазан ГIабдулатIиповасги рагIи кьун буго гьеб рахъалъ кумек гьабизе", — ян бицана гьес.

Памятник баялъулъ халкъалъги гIахьаллъи гьабилеб батилин абураб пикру загьир гьабуна данделъиялда. "Гьел чIвана халкъалъухъе ритIухъаб хабар, хIакъикъияб ахIвал-хIалалъул баян щвезабизе къеркьолаго, гьединлъидал, халкъалъул гIарцухъ базе ккола чIварал журналистазе памятник", — ан абулеб букIана данделъараз.
Памятник баялъе гIарац кьезе буго Россиялъул Журналистазул союзалъги, гьелъул регионалиял отделенияздаги ракIалда буго кумек гьабизе. КватIичIого гьебго мурадалда Дагъистаналда тIобитIизе буго телемарафонги. Хьул буго гьелъул гIахьалчагIазги гIарцул кумек гьабиялде.

Журналистал чIваялда бан гьарурал такъсирал рагьиялъе киналго мухбирзаби цолъизе ккеялъулги бицана данделъиялда. "Дир буго кIиго суал: щиб нилъеца гьабулеб бугеб хадубккунги журналистал чIвангутIизелъун ва гьел такъсирал рагьизе кколел идарабаздаса жаваб кин нилъеца тIалаб гьабулеб бугеб?" — ан гьикъана ишцоязда Шамил ГIабашиловас, 2008 соналда чIварав "Дагъистан" ГТРКялъул нухмалъулев ХIажи ГIабашиловасул васас. "Дир пикруялда, журналистал чIвалел руго гьеб вахIшияб такъсиралъухъ жидее кинабгIаги тамихI гьабизе гьечIолъиялда ракIчIарал чIвадарухъабаз", — ан тIадеги жубана гьес.