19 декабралда Турциялъул тахшагьар Анкараялда тIобитIулеб букIана "Турказул бераздалъун Россия" абураб суратазул выставка.

Гьеб рагьиялъул тадбиралда гIахьаллъарав Россиялъул посол, 62 сон барав Андрей Карлов чIвана. Выставка рагьиялъул тадбир бахъулеб букIана журналистаз. Гьезул видео — ва фотоматериалаздасан мухIканго бихьулеб буго Андрей Карловасде кьвагьдарав чи гьесда нахъа эхетун вукIараблъи.

Россиялъул посол чIваялда бан, батIи-батIиял пикраби загьир гьаруна политиказ, журналистаз ва рагъулал экспертаз. Абулеб буго, гьев чIванин Сириялда унеб рагъулъ Россия гIахьаллъи сабаблъун. Кьвагьдолеб мехалда, чIвадарухъанас абурал рагIабиги рехсолел руго гьез. Масала, гьеб лъугьа-бахъиналъул гьадин бицун буго "Комсомольская правда" радиоялъул рагъулав мухбир Александр Коцица: "53 секундалъ террорист ахIделев вукIана. "Гьаб нужее Сириялъухъ! Гьаб нужее ХIалабалъухъ", — ан.

Бакъбаккул улкабазул гIелмиял цIех-рехал гьарулев гIалимчи СагIид Гъапуровасул пикруялда, посол чIвай ккола Турциялда ва Россиялда гьоркьоб бугеб бухьен тIезабиялъул мурадалда гIуцIараб такъсир. Гьединабго пикруялъул рахъкколеб буго Турциялъул журналист ФугIад ГIабасовасги. "Кьвагьи бахъана Россиялъул ва Турциялъул бухьеназул вакил кIалъазе байбихьидал. Гьеб ишги гьабуна нилъер улкаби цоцалъ рагъизариялъул мурадалда", — ян рикIкIунеб буго гьес.

Турциялда вугев Гъиргъизистаналъул посол Ибрагьим Жунусовас ракIалдещвезабуна: "Дунги Узбекистаналъул ва Тажикистаналъул вакилзабиги выставкаялде ахIана Андрей Карловас. Гьев вукIана дир гьудул. СНГялъул вакилзаби кидаго цадахъ унаан батIи-батIиял тадбиразде. Кьвагьдарав гIолохъанчи байбихьудасаго вукIана гьенив. Гьесде кинабгIаги щаклъиги ккечIо. ЧIегIераб костюмги ретIарав, каранда цо кинабалиго гIаламатги барав чи вукIана гьев. Гьев Андрейида нахъа эхетараб мехалда пикру ккана хIинкъи гьечIолъи чIезабулеб къокъаялдаса чи ватилин. Хадуб бахъана кьвагьи. Гьес ахIарал рагIабаздасан дида бичIчIулеб букIана гIицIго "бетIер борхуге, чIвазе ругоян". Андрей Геннадьевич вукIана хIалимав чи…".

Андрей Карлов вукъана Москваялда. Улкаялъул президент Владимир Путинил указалда рекъон, гьесие кьуна "Россиялъул БахIарчи" абураб цIар.