Гьениб гIуцIана журналистазул хIалтIабазул "Медиа-Кавказ" конкурсги. Округалъулго журналистал, хIукуматалъул гIуцIабазул, жамгIияталъул вакилзаби, федералиял экспертал ракIарун рукIана форумалде. Гьенир рорхана пачалихъиял гIуцIабазулгун СМИялъул букIине кколеб гьоркьоблъиялъул, СМИяз Северияб Кавказалъе кьолеб къиматалъул ва къватIире риччалел харбазул, динияб журналистикаялъул, кризисалъул заманалда СМИязул хIалтIул, миллияб прессаялъул ругел захIмалъабазул хIакъалъулъ ва цогидалги суалал. Гьединго бихьизабуна Дагъистаналдаса режиссер Амет-Хан МухIамадовасул "Борхалъуда кьурдаби" абураб фильмги, тIобитIана Северияб Кавказалъул журналистазул хIалтIул бицунеб суратазул выставкаги. СКФОялда РФялъул президентасул ишал тIуразарулеб гIуцIиялъул кумекалдалъун, гьанжесеб Кавказалъул политикаялъул централъ гIуцIараб форумалда тIобитIараб "Медиа-Кавказ" конкурсалда 20 батIияб номинациялда рекъон, журналистазул бищунго лъикIал хIалтIаби тIасарищана. Шапакъатал щварал журналистазул хIалтIабазулъ бицунеб буго Кавказалъул гьоболлъиялъул ва туризмалъул, тIабигIаталъул, экологиялъул, гIелмиял цIигьариязул, цIар арал гIадамазул, спорталъул хIакъалъулъ. ЛъикIал къиматал щвана Дагъистаналъул СМИязеги, "Орленок" абураб лъималазул журналалъул гьитIинал журналистазеги.

СКФОялъул журналистазул тIоцебесеб форум тIобитIун букIана 2013 соналда. Гьелдаса нахъе гIадатлъун лъугьана Северияб Кавказалъул журналистаз, гьеб форумалъул кумекалдалъун, цоцазул хIалбихьияздаса мисал боси, цоцазул хIалтIул хIасилазул ва республикабазда дандчIвалел суалазул бици.

СКФОялда РФялъул президентасул вакиласул заместитель Михаил Ведерниковас форумалда бицана арал соназда тIоритIарал форумазул мурад журналистазул махщел камил гьаби ва цоцазул хIалбихьияздаса пайда боси букIун батани, исана кIвар кьолеб масъалалъун кколин пачалихъалъул нухмалъиялъул гIуцIабазулгун журналистазул цадахъаб хIалтIи гIуцIи.

Щуго-анлъго соналъ цебе федералиял СМИяздасан Кавказалъул хIакъалъулъ квешаб пикру тIибитIизабулеб букIун батани, ахираб заманалда къватIибе кьолеб информациялъул 70 процент бугин лъикIаб рахъ бихьизабулебилан абуна Ингушетиялъул бетIер Юнус-Бек Евкуровас.

2017, экологиялъул соналде СКФОялда тIоритIизе ругел тадбиразул хIакъалъулъ бицана форумалда гIуцIараб данделъиялда. ДРялъул тIабигIаталъул ва экологиялъул министр Набиюла Гъарачаевги кIалъана гьенив. 2017 соналда Дагъистаналда экология лъикIлъизабизелъун тIоритIизе ругел тадбиразул план гIуцIун бугин ва гьелдехун жамагIаталъулги кIварбуссинабизе кколин бицана министрас.

Ахираб заманалда нилъер республикаялда сверухълъи бацIцIад цIуниялъул рахъалъ лъикIаб хIал гьечIеблъи хIисабалдеги босун, халкъалдехун тIабигIат цIунейин абурал пикраби ва ахIиял щвезаризе ккелин журналистазин бицана данделъиялда.

СМИялъул форумалда ДРялъул печаталъул ва информациялъул министр Бурлият Токболатовалъ ва "Рамблер" интернет-порталалъул директор Матвей Алексеевас къотIи-къай гьабуна СКФОялъул журналистазул махщалил даража борхизабиялъул, социалияб рахъалъ жавабчилъи цIикIкIинабиялъул, Северияб Кавказалда цогояб информациялъулаб дунял гIуцIиялъул мурадалда.
ПатIимат СултIанмухIамадова