Видеоконференциялда гIахьаллъана ДРялъул бетIер Рамазан ГIабдулатIиповги.
Регионазулгун бухьен кквезе санагIатаб къагIида — видеоконференция — гIемер хIалтIизабула ахирал соназда улкаялъул нухмалъулез. РФялъул премьер-министрас тIобитIараб дандеруссиналда бицана лъимер гьабурай эбелалъул ва гьитIичил сахлъицIуниялъул мурадалда улкаялда гIуцIулеб хIалтIул хIакъалъулъ.
Дмитрий Медведевас гара-чIвари байбихьана улбул ва лъимал хвеялъул хIужаби дагьлъиялъул бициналдаса.

"Ахираб 25 соналда лъимал хвеялъул къадар лъабил бутIаялдасаги дагьлъана: 100 азарго гьабураб лъимада гьоркьоса 10-яб гурони холеб гьечIо гьанже. Щуго соналде рахарал лъимал хвеялъул хIужаби дагьлъана кIиго нухалъ. Гъоркьисала 1000 лъимада гьоркьоса анлъгояб хвана. Исана 10 моцIида жаниб гьединазул къадар, щугоялдаса дагьалъ гурони, цIикIкIинчIо", — ян бицана премьер-министрас.

Дмитрий Медведевас бицана 2008-2015 соназда улкаялда 25 перинаталияб центр банин. 2014 соналда базе байбихьана жеги 32 гьединабго центр. Гьаб лъагIалил ахиралде Дагъистаналда, Кабардино-Балкариялда, Алтай, Красноярск краязда ва Брянск областалда перинаталиял централ ран рахъизе кколин абуна гьес. "Нилъер гьеб хIаракат гIададисеблъун хутIизе буго, бажари бугел махщелчагIи гьел центразда хIалтIулел гьечIони. Акушер-гинекологазул, неонатологазул, педиатразул махщел камиллъизабиялъул мурадалда, 2011 соналдаса нахъе федералиял пачалихъиял идарабазул кьучIалда рагьана 18 центр, жеги кIиго хIадурулебги буго. Гьел ишазги махщел цIубарал тохтурзаби цIикIкIинариялъе квербакъиялде хьул буго", — ян абуна Дмитрий Медведевас.

Эбелалъул ургьибго лъимадул сахлъиялда хадуб халкквеялъе гьарулел хIалтIабазул хIакъалъулъ бицана РФялъул сахлъицIуниялъул министр Вероника Скворцовалъ. "Эбелалъул ургьибго лъимадуе санайил гьабула щунусгоялдаса цIикIкIун операция. Щуго соналъ цебе щуго-анлъго гурони гьединаб операция гьабун бажарулароан. ЛъикIаб цебетIей буго цIигьарурал лъималазул кардиохирургиялъулги. Гьелъул хIасилалда би хьвадиялъул къагIида мекъса хIалтIиялъул рахъалъ сакъатлъигун гьарурал гьитIичазул къадар 2013 соналдаса 2015 соналде дагьлъана ичIго проценталъ", — ан бицана министралъ.

"2011-2016 соназда ДРялъул сахлъицIуни цIигьаби" абураб пачалихъияб программаялда рекъон, декабралда МахIачхъалаялда рагьизе ккола 150 унтарасе бакI бугеб перинаталияб центр. 2015 соналда Дербенталда хIалтIизе байбихьана 50 бакI бугеб лъимал гьарулеб рукъ ва Хасавюрталда — 160 бакI бугеб республикаялъул перинаталияб центр.

Заман щвелалдего гьарурал лъималазе реанимациялъулаб ва неонатологияб кумек гьаби камиллъизабиялдалъун, ахираб лъабго соналда 29,3 проценталъ цIикIкIана 500 граммалдаса 1500 грамм бугел гьединал лъимал чIаго хутIиялъул къадар.

Ахираб кIиго соналда жаниб федералиял центразда лъай камил гьабуна 193 тохтурас.
ЦIикIкIараб кIвар кьолеб буго росабалъ гьарулел гьитIичаздеги. Республикаялъул перинаталиял центразул ва лъимал гьарулел рукъзабазул тохтурзабаз районазде сапарал гьарула. 2016 соналъул ичIго моцIалда жаниб гьабуна 17 сапар ва 8167 лъимералъухъ халгьабуна. Цогидал регионаздаги гьединаб къагIидаялда гIисинал лъималазе кумек гьабиялъул хIалтIи гIуцIеян лъазабуна РФялъул СахлъицIуниялъул министерствоялъ.
"ХIакъикъат" газетаялдаса босараб