Проекталъулаб нухмалъи гIуцIиялъул, щибаб муниципалитеталда проекталъулал офисал рагьиялъул, промышленность цебетIеялъул рахъалъ улкаялъул регионазда гьоркьоб щуабилеб бакIалде рачIиналъул, росдал магIишаталъул бутIаялда ругел хIасилазул, экономика загьираблъун гьабиялде кьолеб кIваралъул ва цогидал ишазул бицана ГIабдулатIипов Рамазаница. "Гьел хиса-басияз рес кьуна республикаялда чIара-хьараб ахIвал-хIал лъугьинабизе. Гьебго заманалда, республикаялъул бюджет мукъсанаб букIин хIисабалдеги босун, гьеб гIакъилго хIалтIизабизе ва, аслиял рахъазде гурони харжалги гьаричIого, хIалтIи гIуцIулеб буго. Гьединаб къагIидаялъ гъоркьисала тIокIлъизабуна бюджеталъул лъабго миллиардгун нусго миллион гъуруш. Исанаги ункъо миллиард гъуруш тIокIлъизабизе ракIалда буго. Гьелъие ресги буго", — ян бицана республикаялъул бетIерас.

Дагьалъ цере тIоритIарал рищиязда республикаялъул парламенталде ва Россиялъул Пачалихъияб Думаялде "Цогояб Россиялъул" депутатазе цIикIкIарал мандатал щвеялъулги ракIалдещвезабуна ГIабдулатIипов Рамазаница. Депутаталлъун цIиял гIадамал рищиялъулги (республикаялъул парламенталъул къадар 57 проценталъ цIигьабунин) абуна гьес. Гьел хIужабазги Дагъистаналда чIара-хьараб ахIвал-хIал букIиналъе нугIлъи гьабулинги абуна. Бицана ДРялъул бетIерас республикаялда гIумруялде рахъинаризе хIадурарал аслиял проектазул хIакъалъулъги ва гьезул кумекалдалъун ахIвал-хIал жеги камиллъиялде хьул букIиналъулги.

ДандчIваялда хабар ккана ахирал къоязда Дагъистаналъул тахшагьаралда лъугьарал ишазулги. "10 къоялъниги гьоркьор къотIичIого чвахунцIадал рана. Канализациялъул рогIразде хIалщвана ва гьенисан чвахулеб чороклъи гьекъолеб лъеда гъорлъе ана. Гьелъул хIасилалда цадахъго гIемер чи унтиялъул хIужа букIана. Чехь-бакьазул унти ккарав 273 чи вуго хутIун гьабсагIаталда больницабазда. Гьезда гьоркьоса 80 — чIахIиял ва хутIарал — лъимал руго. Цониги чи хвечIо. КIиго чи вукIана реанимациялда, цояв сахлъун вуго, цогидасулги иш квеш гьечIо.

АхIвал-хIал лъикIлъулеб буго. Гьелъие квербакъана федералиял ва республикаялъулал сахлъицIуниялъул идарабазул цадахъал ишаз. Роспотребнадзоралъ ва цогидал идарабаз халкколеб буго. РФялъул хIукуматалъул председатель Дмитрий Медведевасул берзукь буго гьеб иш. Нижергун бухьенги гьабуна, хIажатабщиналъе гIарацги биччана, гIарац бачIана ФОМСалдасаги, кьуна ДРялъул хIукуматалъги, РФялъул СахлъицIуниялъул министерствоялъги. ХIажатал дараби ва вакцинаби росана. АхIвал-хIал лъикIлъулеб букIиналда ракIчIараб мехалда тIадюссана Дагъистаналде щварай Анна Попова (Роспотребнадзоралъул бетIерай санитарияй тохтур)", — ян бицана ДРялъул бетIерас.

АхIвал-хIал хIалуциналъе гIиллалъун гьес рехсана гIемерал соназ хIалтIи тIаса-масаго гьаби. "ГIемерал идараби, гьездаго гьоркьоб "Водоканалги", церехун нухмалъиялда рукIарал гIадамазул гIагарал чагIазухъе кьун рукIана ва гьез, къачIазе яги цIигьаризе кколел бакIазул тIалабги гьабичIого, чанго соналъ жидеего пайдаялъе хIалтIизабулаан гьелъие кьолеб букIараб бюджеталъул гIарац. ГьабсагIаталда, гьеб лъугьа-бахъиналда бан, ЦIех-рехалъул комитеталъул управлениялъ уголовнияб дело рагьун буго. ГIайибиязе кьварараб гIадлу гьабизе буго", — ян бицана ГIабдулатIипов Рамазаница.
ДРялъул бетIерасул администрациялъул ва ДРялъул хIукуматалъул пресс-хъулухъ