20 октябралда Симферополалъул шагьаралъул советалда гьединаб къотIи-къаялда гъоркь гъолбасана МахIачхъалаялъул мэр Муса Мусаевас ва Симферополалъул бетIер Виктор Агеевас.

Крымалъул тахшагьар вацлъиялъул бухьеназе кидаго рагьараб бугин абуна дандчIваялда Симферополалъул бетIерас. "Россиялда гъорлъе ниж тIадруссараб заманалда федерациялъул гIемерал регионаз — гьезда гьоркьоб Дагъистаналъги — нижехъе кумекалъул квер бегьана. Методикияб ва моралиябгун техникияб рахъалъ нижее квербакъаралъухъ баркала буго киназего", — ян абуна Виктор Агеевас. Официалиял идарабазул гуребги, халкъазул бухьеназулги кIудияб кIвар бугин бицана гьес. "Щибаб къотIи-къай ккола гIадамазул, жамгIиял гIуцIабазул, бизнесменазул, культуриялгун гIелмиял цолъабазул бухьенал щулалъизаризе рагьулеб нух", — ан абуна Симферополалъул бетIерас.

Шагьаразул бухьенал гьариялдалъун кIиябго субъекталъул цебетIей цIилъулин бицана Мусаев Мусаца. "2015 соналда Крымалъул бетIер Сергей Аксаковас ва Дагъистаналъул бетIер ГIабдулатIипов Рамазаница, кIиябго республикаялъул, дармилгун экономикаялъул, гIелмиялгун техникиял, социалиялгун культуриял бухьенал гьариялда бан, къотIи-къай гьабуна. Жакъа нилъеца гьеб лъикIаб иш цебетIезабулеб буго. Документазда гъоркь гъолбасиялда гIей гьабун чIечIого, нилъее бокьун буго кIиябго регионалъул цадахъал ишал гIуцIизе, интеллектуалиябгун захIматалъулаб бухьен щулалъизабизе", — ян абуна гьес.