Сулахъ-Къуруш маххул нухкъотIун машина бачунаго, гьениб автоматикияб сигнализация хIалтIулеб букIаниги, гьелъухъ ва гьенибе гIагарлъулеб поездалъул машинистас кьолел сигналазухъ санги гьабичIого "Мерседес" машинаялъул водитель Ж. ЖабрагIиловас гьеб, ПДДялъул тIалабалги хвезарун, маххул нухде бачана. Гьелъул хIасилалда поезд машинаялда тункана ва ЖабрагIилов ботIрое жагъаллъиги ккун Хасавюрталъул районалъулаб больницаялда лъуна. Гьеб авариялъул хIасилалда "МахIачхъала-Москва" пассажиразулаб поезд маххул нух эркен гьабизегIан чIезе ккана кIиго сагIатгун 15 минуталъ.

16 октябралда Темиргъое-МахIачхъала маххул нухдаги ккана авария. Маххул нух къотIун унеб бакIалда автоматикияб сигнализация хIалтIулеб букIаниги "ГАЗ-31106" автомашинаялъул водитель ГIабдурашидовас светофоралъул гьукъараб сигналалда гъоркь машина маххул нухде бачана ва гьелда поезд тункана. Гьелъул хIасилалдаги пассажир Э. Аджиева ЦIияб ЧIикIаб участкаялъулаб больницаялда лъуна.

МахIачхъала регионалда маххул нух къотIун унел бакIазда хIинкъи гьечIолъи букIинабиялъул ахIвал-хIал лъикI гьечIо.

Северияб Кавказалъул маххул нухлул нухмалъулезул цIакъ рахIат хвезабун буго ДРялда маххул нухал къотIун унел бакIазда поездал хьвадиялъе хIинкъи гьечIолъи букIинаби цIакъго квешаб хIалалда букIиналъ. СКЖДялъул маххул нухал къотIун унел бакIазда исана ичIго моцIалда ккараб 24 авариялъул анкьгояб ккун буго ДРялда маххул нухал къотIулел бакIазда. Поездал автотранспортгун тункиялъул гьабураб анализалъ бихьизабулеб буго ДТПял автотранспорталъул водителаз ПДДялъул тIалабал хвезариялъул хIасилалда кколел рукIин. ДТПязул хIасилалда абуни хола ва лъукъа-къотIи ккола гIадамазе, кIудияб материалияб зарал ккола маххул нухлуе, поездазе ва автотранспорталъе.

ХIурматиял водителал: кIочон тоге маххул нух къотIун унеб бакI, нухлул цIакъго хIинкъи бугел бутIабазул цояб букIин, гьенисан машина бачунаго цIакъго цIодорлъи гьабизе ва ПДДялъул тIалабал кьварун тIуразаризе кколеблъи. Пикру гьабе поезд тохлъукьего чIезабизе рес букIунареблъи, гьеб тIаде щолаго маххул нух къотIун машина бачине кIудияб хIинкъи букIунеблъи. Гьенисан унаго минутазул экономия гьабиялъ нус-нус гIадамал талихIкъосараллъун лъугьине бегьулеблъи. КIочон тоге нуж сапаралдаса руссиналъухъ балагьун рокъор хъизамал ва гIага-божарал рукIин! ЦIодорлъи гьабе!