Жакъа бицен гьабизе бокьун буго Гъуниб районалъул КIогьориб росулъа тохтур, хирург Казим Къадировасул. Гьесул хIакъалъулъ макъала бугоан Липецк областалъул журналистаз хъван.

Тохтурасул ишалде Казимил рокьи бижана инсудасан. Эмен, МухIамад Къадиров, 40 соналъ хIалтIулев вуго Хлевенский районалъул больницаялда, хирургиялъул отделениялъул заведующийлъун. Эбел, ПатIимат ГIабдулхIалимовна, хIалтIулей йиго гьебго больницаялда лабораториялъул заведующаялъун.

Гьавуна Казим Хлевное росулъ. Школа лъугIун хадуб, гIемер ургъизе ккечIо махщел тIаса бищиялда тIад — гьев ана инсул нухдасан. ЛъугIизабуна Дагъистаналъул медакадемия. Гьелдаса хадуб, 15 соналъ хIалтIана тохтур-хирурглъун "НЛМК" ОАОялда. КватIичIого гIолохъанав хирургасул цIар тIибитIана районалдаго. Васасул хIалтIуда хадуб кIудияб кIвар кьун халкколеб букIана эбел-инсуцаги. Казимил адаб-хIурмат гьабула районалъул сахлъи цIуниялъул управлениялъул начальник Алексей Байцуровасги. Гьесда лъала, щиб иш тIадкъаниги, Казимихъа гьеб тIубан бажарулеблъи. Гьелъго батила, Липецк областалъул Измалковский районалъул больницаялъе бетIерлъи гьабизе тохтур къваригIиндал, гьесда ракIалде Казим Къадиров щваравги.

ЦIакъго кIудияб кIваралъулги жавабчилъиялъулги иш тIаде босана Казим МухIамадовичас. Гьес хIалтIи байбихьана больница тохтурзабаздалъун хьезабиялдалъун.

ГьабсагIаталда больницаялда гIолел гьечIо офтальмолог, гинеколог, эндокринолог, эндоскопист, психиатр, нарколог, терапевт, стоматолог, невролог. Щун руго педиатрал, сентябралда хIалтIизе вачIине вуго кIиго терапевт.

Лъайги, махщелги, хIалтIуде рокьиги бугеб коллектив гьечIони, хIалтIи цебехун унареблъи бичIчIулеб буго бетIерав тохтурасда. Руго больницаялда "Земский доктор" проекталда рекъон хIалтIизе рачIаралги. Гьаб заманалда гьезие кьолеб цо миллион гъурущги лъикIаб иш буго.

— Амма цохIо гъурщазе гIоло тохтурлъи тIаса бищарав чиясул унго-унгояв тохтур вахъунаро. Гьесие рокьизе ккола унтарал, гьезул къварилъаби-пашманлъабигун цадахъ. ХIатта унтарасул мекълъиялъул, гIамаликълъиялъул адаб гьабизе ккола тохтурас, — ан абула Казимица.

Руго больницаялда цIигьарун къачIазе кколел минабиги бакIалги, масала, котельня. Гьеб кинабго хасел щвелалде гьабизе кколин, хIалтIуде тIаделъун вуго гьев. Гьесул хIакъалъулъ Липецк областалъул журналистаз, гьес гIумру хвасар гьабурал нус-нус унтараз, цадахъ хIалтIулел гьалмагъзабаз хъвараб цIалидал, бихьулеб буго тIадегIанаб категориялъул тохтур-хирург, нилъер ракьцояв, Дагъистаналъул медакадемия лъугIарав Казим Къадировасул бугеб къадру-къимат. Гьединал мисалал жеги гIемер рачине бегьула. Гьелдаса хадуб кинха божилел Дагъистаналъул медакадемия лъугIарал Россиялъул регионазде хIалтIизе росулел гьечIин абураб жоялда. Кив цIаланиги щиб, тIаса бищараб махщалиде рокьи бугони, гьес гьеб рокьи жиндирго ракIбацIцIадал ишаздалъун бихьизабула. Гьеле гьединав, тIаса бищараб махщалие ритIухъав, гIумруялъул талихIал лахIзатал унтаразе кьолаго, къисматалъул икъбал батарав тохтур ккола Казим Къадиров.

— ГIелмияб хIалтIуда тIадги хIалтIулев вукIана. Амма гьабсагIаталда гьелде регIун гьечIо, гьединлъидал дагьалъ нахъбахъизе ккана. Рокъове инегицин заман батулеб гьечIо, — ян абулеб буго Казим МухIамадовичас.

Нух битIаги дуе, хIурмат тIадегIанав тохтур. Жеги аза-азар унтаразул баркалаялъе мустахIикълъаги мун, Казим МухIамадович.
Зубейрат Ибрагьимова